शाही शासनको चरमोत्कर्ष रहेको बेला, २०६० साल असोज ११ गते कृष्ण सेन अनलाइनको सुरुवात अग्रगमनको पक्षमा महत्वपूर्ण प्रचार आन्दोलन थियो । हाम्रा अग्रज आदर्श कृष्ण सेन (इच्छुक) को नाममा यसको नामाकरण गरिएको थियो । ज्ञानेन्द्र शाहको अगुवाइमा शेरबहादुर देउवाको नेतृत्वमा गठित एमालेसमेत संलग्न गठबन्धन सरकारले २०५९ साल जेठ १३ गते चरम यातना दिएर क्रान्तिकारी पत्रकार तथा जनकवि कृष्ण सेनको हत्या गरेको थियो । नयाँ सञ्चार प्रविधिमार्फत् चलाइएको यो प्रचार आन्दोलन छिट्टै स्थापित र लोकप्रिय बन्यो । शाही सत्ताले पछि पूरै मिडियामाथि अङ्कुश लगाउँदा जनयुद्धको मात्र होइन नेपालमा भएका सबै घटनाको बारेमा यथार्थ सूचना, सामग्री दिने एक भरपर्दो विकल्प बन्यो यो ।
आमूल परिवर्तनको पक्षमा काम गरिरहेका पत्रपत्रिकाहरु खुल्ला चलाउन नदिइरहेको, जनगणतन्त्र रेडियोको समेत प्रभावकारी भूमिका नभइरहेको समयमा प्रचारात्मक आन्दोलन व्यवस्थित गर्न यसले महत्वपूर्ण भूमिका खेलेको थियो । देशमा शान्ति प्रक्रिया सुरु भएपछि छापा, रेडियो निर्वाध रुपमा चल्न दिएपछि हाम्रो ध्यान यसलाई व्यवस्थित गर्नेतिर रहेन । अग्रगमनका विरुद्ध अहिले जसरी व्यवस्थित तवरबाट सूचनाभ्रम फैलाइएको छ, मनोवैज्ञानिक युद्ध चर्काइएको छ, त्यसलाई चिर्न र सही सूचना दिन हामीले यसलाई पुनः व्यवस्थित गर्नुपर्छ भन्ने ठान्यौं । अब हामी दिनमै धेरैपटक समाचार प्रसारण गर्नेछौं । यसका लागि हाम्रा सहयोगी, शुभेच्छुकबाट सूचना र रचनात्मक सुझावको अपेक्षा गरेका छौं ।    
हिजो जनताले गरेको युद्धको महत्व र त्यसको ऐतिहासिक संवेग आज पनि यथावत छ । वर्गयुद्धलाई थोरै घुमाइएको हो, छाडिएको हैन । सङ्घर्ष नयाँ चरणमा प्रवेश गरेको मात्र छ, पूरै विजय हासिल नगरिएकाले फेरि नयाँ ढंगको संघर्षको आँधी आउनेवाला छ । अहिले आँधी आउनुअघिको सन्नाटा हो । नयाँ आन्दोलन र नयाँ विजयले नै हाम्रा आदर्श कृष्ण सेन (इच्छुक)को सपना पूरा हुनेछ ।