किन थुनिए एलडिओ
?
-
सुरेशकुमार यादव
काठमाडौं, ४ असार
: विभिन्न कर्मचारी संगठनहरूले जिल्ला विकास
समितिका ललितपुरका स्थानीय विकास अधिकारी
(एलडिओ)डण्डुराज घिमिरेले
ठेकेदारहरूसँगको मिलेमतोमा अनियमित ढंगले ढुंगाखानी
सञ्चालन गरेको खुलासा गरेका छन् ।
नेपाल राष्ट्रिय कर्मचारी
संगठनद्वारा बुधबार जारी प्रेस विज्ञप्तिमा निज एलडिओले
स्थानीय स्रोतमा जनताको पहुँच र अधिकारप्रति खेलवाड
गरेको कुरा उल्लेख छ । उक्त विज्ञप्तिमा उनले
बिनाइजाजत खानीबाट ढुंगा निकाली वातावरण तथा जनजीविकामा
असर पर्नेगरी जनचाहनाविपरीत मनोमानी गरेको जनाइएको छ ।
एक स्रोतका अनुसार निज एलडिओले
चापागाउँ तथा देवीचौर क्षेत्रको सामुदायिक वनबाट यसरी
ढुंगाखानी सञ्चालन गरेपछि जनता त्यसबाट प्रत्यक्ष
पीडित भएका थिए । त्यसैले उनीहरूले वन मन्त्रालयमा पटक
पटक उजुरी समेत गरेका थिए । मन्त्रालयले सोही उजुरीको
अध्ययन गरेर तत्कालै त्यसको छानबिन गरी निज एलडिओलाई
उक्त कार्य रोक्न/रोकाउन आग्रह गरेको थियो । तर एलडिओले
त्यसमा कुनै पहल नगरेको मन्त्रालयले जनाएको छ ।
मन्त्रालयका अनुसार वन तथा
भू-संरक्षणमन्त्री मातृकाप्रसाद यादव स्वयम्ले उक्त
खानी निरीक्षण गरी ठेकेदार र सम्बन्धित निकायलाई सो
काम रोक्न आग्रह गर्नुभएको थियो । तर यति हुँदा पनि
ढुंगा उठाउने कार्य रोकिएन ।
वन विभागका एक अधिकृतका
अनुसार त्यस्तो खानी चलाइएको झन्डै वर्ष हुनलाग्यो ।
मन्त्रालयले खानी बन्द गर्न आग्रह गरेको पनि त्यति नै
समय भयो । तैपनि एलडिओले यो कुरा नमानेपछि मन्त्री
यादवले यस्तो कदम चाल्नुभएको हो ।
स्थानीयबासीका अनुसार खानीले
गर्दा यस क्षेत्रको वनजंगल विनाश हुनेक्रममा पुगेको छ
। वरिपरिको वातावरण बिग्रदैं गएपछि जनताले मन्त्रालयमा
आई हारगुहार मागे । अनि मन्त्री यादवले मंगलबार जिविस
ललितपुरका एक कर्मचारीसहित स्थानीय विकास अधिकारीलाई
आफ्नो मन्त्रालयमा बोलाउनुभयो ।
खानी सञ्चालन गर्न खानी विभाग
र जिल्लाभित्र कुनै खानी सञ्चालन गर्दा जिविसबाट अनुमति
लिनुपर्ने प्रावधान छ । तर एलडिओले उक्त
प्रावधानअनुसार काम नभएको पनि मन्त्री यादवसमक्ष
स्वीकार्नुभयो । यता कुनै वनमा पनि ढुंगा र बालुवा खानी
सञ्चालन गर्नहुँदैन । गर्नपरेमा पनि वन विभागबाट अनुमति
लिनुपर्छ ।
स्रोत थप्छ,'त्यसपछि मन्त्री
यादवले तपाइले अहिलेसम्म यो कार्य किन रोक्नुभएन, जनता
यतिको मर्कामा परेका छन्, वन दिनदिनै विनाश भइरहेको
भन्नुभयो ।’
एलडिओले भने-'ठेकेदारहरूले मानिरहेका छैनन्, म के
गर्नसक्छु ?’
मन्त्री यादवले फेरि भन्नुभयो-'त्यसो भए त्यहाँको
अनियमितता रोक्नुस् ।’
एलडिओले भने-'त्यो पनि सकिदैन ।’
मन्त्री यादवले भन्नुभयो-'त्यसो भए खानी बन्द गराउन
सकिना, त्यहाँ अनियमित तरिकाले काम भइरहेको छ भनेर
लेखेर दिनुस् ।’
एलडिओले जवाफ दिए-'मन्त्रीजी तपाइजस्तो व्यक्तिले
यस्तो कुरा त बुझ्नुहुन्न भने कसले बुझ्छ ।’
मन्त्री यादवले फेरि भन्नुभयो-'तपाइले मलाई के
बुझाउन खोज्नुभएको त्यो प्रस्ट पार्नुस् ।’
एलडिओले फेरि त्यही कुरा दोहार्याए-'तपाइ यस्तो
कुरै बुझ्नुहुन्न ।’
'मलाई अरू कुरा केही
थाहा छैन, स्थानीयबासी साह्रै मर्कामा छन्, त्यसका लागि
सो खानी तत्काल बन्द गर्नुपर्छ’- मन्त्री यादवले
अन्तिम आग्रह गर्नुभयो ।
