|
अन्ततः
संविधानसभामा मतदान हुने
दीपक खनाल/हरि लामिछाने
काठमाडौं, १० असार
: सात राजनीतिक दलबीच
मंगलबार लामो समयसम्म बसेको बैठक सहमति नजिक पुगेको
भनिए पनि अन्ततः असहमतिका बुँदाहरूमा संविधानसभामा
मतदान हुने भएको छ ।
नेकपा
(माओवादी) प्रवक्ता एवं
सूचना तथा सञ्चारमन्त्री कृष्णबहादुर महराले जनदिशासँग
कुरा गर्दै संविधान संशोधन गरी राष्ट्रपति चयन गर्ने
प्रमुख मुद्दा भएकाले आफूहरूले त्यसैलाई जोडतोडका साथ
उठाएर लैजाने जानकारी दिनुभयो । उहाँले सहमति र
असहमतिका बुँदाहरूलाई सँगसँगै लिएर जाने र सहमति हुन
नसकेका बुँदालाई संविधानसभा बैठकबाटै टुंगो लगाउने पनि
बताउनुभयो ।
नेता महराले कांग्रेसका केही
बुँदामा माओवादीको असहमति रहेको बताउँदै राष्ट्रपतिका
लागि पनि संविधानसभामा मतदान हुने बताउनुभयो ।
यसैबीच वार्तामा सहभागी
विभिन्न राजनीतिक दलका नेताहरूले छलफल सहमतिको नजिक
पुगेको बताएका छन् । उनीहरूले छलफलका धेरैजसो
बुँदाहरूमा सहमति भइसकेका र सहमति हुन बाँकी रहेका
बुँदामा बुधबार बिहान शिर्ष नेताहरूबीच बैठक बसेर
त्यसको अन्तिम टुंगो लगाउने जानकारी पनि दिएका छन् ।
सिंहदरबारस्थित एमाले संसदीय
दलको कार्यालयमा दिउँसो २:०० बजेदेखि राति १० बजेसम्म
बसेको बैठकले संविधान संशोधन र शान्तिप्रक्रियाको
विधेयकलाई व्यवस्थापिका-संसद्को हैसियतमा बुधबार बस्ने
संविधानसभा बैठकमा लिएर जाने निर्णय गरेको हो ।
यसैअनुरुप उक्त विधेयकलाई बुधबार मन्त्रिपरिषद्को बैठक
बसी सरकारले नै संविधानसभामा पेस गर्ने छ ।
छलफललगत्तै सञ्चारकर्मीसँग
कुराकानी गर्दै महराले सात दलहरू करिब-करिब सहमतिको
नजिक पुगिसकेको बताउनुभएको थियो ।
उहाँले आमसहमतिको दस्तावेज
तयार गरिसकिएको र त्यसमा सामूहिक हस्ताक्षर हुन बाँकी
रहेको बताउँदै भन्नुभयो- 'सहमतिको दस्तावेजमा संविधान
संशोधन, राष्ट्रपति, उपराष्ट्रपति, प्रधानमन्त्री,
संविधानसभाको अध्यक्ष, उपाध्यक्षको निर्वाचन, सेना
समायोजनसँग सम्बन्धित र द्वन्द्व व्यवस्थापनसँग
सम्बन्धित कुराहरू उल्लेख भएका छन् ।’
उहाँले बुधबार बिहान बस्ने
शिर्ष नेताहरूको बैठकले सहमतिलाई निष्कर्षमा पुर्याउने
जानकारी पनि दिनुभयो ।
यसबारेमा नै
सञ्चारकर्मीहरूसँग बोल्दै एमाले महासचिव झलनाथ खनालले
शान्तिप्रक्रियाबारे समग्रतामा छलफल गरिएको जानकारी
दिनुभयो । उहाँले आगामी छ महिनाभित्रमा सम्पूर्ण
शान्तिप्रक्रियालाई समापन गर्ने सहमति भएको पनि
बताउनुभयो ।
सञ्चारकर्मीहरूसँग कुरा गर्दै
नेकपा -एकता-केन्द्र-मसाल)का महासचिव नारायणकाजी
श्रेष्ठ 'प्रकाश’ले
पनि छलफल सहमतिको धेरै नजिक पुगेको बताउनुभयो । उहाँले
बुधबार बिहान ९:०० बजे
शिर्ष नेताहरूको बैठकले अन्तिम सहमति गरेर मस्यौदामा
हस्ताक्षर गर्ने जानकारी दिनुभयो ।
गृहमन्त्री कृष्णप्रसाद
सिटौलाले पनि संविधान संशोधन र शान्तिप्रक्रियासम्बन्धी
सहमति भएको जानकारी दिनुहुँदै यी दुवै प्रस्ताव
संविधानसभामा प्रस्तुत गरिने बताउनुभयो ।
यसैगरी उक्त बैठकबाट दलहरू
सेना समायोजन शान्तिसम्झौता र अन्तरिम संविधान-२०६३ मा
उल्लेख भएबमोजिम गर्न पनि सहमत भएका छन् । त्यस्तै
बैठकले संयुक्त राष्ट्रंघीय राजनीतिक मिसन अनमिनको
म्याद छ महिना बढाउने निर्णय पनि गरेको छ ।
बैठकले मनोनित २६ जना सभासद्का
विषयमा मंगलबार पनि कुनै टुंगो लगाउन सकेन ।
|
